Mtwara Yafanya Matembezi ya Hisani Kuelekea Uzinduzi Mwenge wa Uhuru

Posted on: February 18th, 2023

Mkuu wa Mkoa wa Mtwara COL. Abbass Ahmed Abbass amewaongoza mamia ya wananchi wa Mtwara kushiriki kwenye matembezi ya hisani ya uzinduzi wa shughuli mbalimbali za kijamii zitakazofanyika kuelekea kwenye  uzinduzi wa mbio za Mwenge wa Uhuru unaotarajia kufanyika Kitaifa  Mkoani Mtwara ifikapo April 2, 2023 kwenye uwanja wa Nangwanda Sijaona uliopo Manispaa ya Mtwara-Mikindani.

COL. Abbass amesema kuwa Kuelekea kwenye uzinduzi huo Mkoa umeandaa matukio mbalimbali ya kijamii yatakayokuwa yanafanyika kwenye kila Wilaya na halmashauri yakiwemo   maonesho ya wafanyabiashara yatakayofanyika Uwanja wa Mashujaa pamoja na matukio mengine mengi.

Aidha Mhe. Mkuu wa Mkoa amewashukuru wadau na wananchi wote waliohudhuria kwenye matembezi hayo na amewataka kuwa mabalozi wa kuhamasisha ujio wa Mwenge wa Uhuru ili kila mmoja aweze kushiriki kwenye uzinduzi wa Mwenge huo.

Pamoja  na Mkuu wa Mkoa matembezi hayo pia yalihudhuriwa na wabunge kutoka majimbo mbalimbali Mkoani hapa, Wakuu wa Wilaya, Wakurugenzi wa halmashauri, Kamati ya Ulinzi na Usalama Mkoa na Wilaya ya Mtwara , Viongozi mbalimbali wa Taasisi za Kiresikali na binafsi Pamoja na wananchi wa Mtwara.