Wataalamu Wahimizwa Kusimamia Mapato na Matumizi

Posted on: August 1st, 2023

WATAALAMU WAHIMIZWA KUSIMAMIA UKUSANYAJI WA MAPATO NA MATUMIZI

Mstahiki Meya wa Manispaa ya Mtwara-Mikindani Mhe. Shadida Ndile amewahimiza wataalamu kuhakikisha wanaongeza juhudi kwenye ukusanyaji wa mapato pamoja na kusimamaia matumizi ya fedha zinazotokana na mapato hayo ili Manispaa iweze kutekeleza miradi ya maendeleo kwa kutumia mapato ya ndani yanayokusanywa.

Amesema kuwa  katika robo hii Halmashauri itapeleka fedha za miradi kwenye Kata ambazo wananchi wake wameanzisha miradi ya maendleo kwa  nguvu zao wenyewe.

Aidha Mhe. Ndile amemshukuru Rais wa Jamhuri ya Muungano wa Tanzania Mhe. Samia Suluhu Hassan kwa kuendelea kutatua changamoto kwenye sekta mbalimbali kwa kuleta fedha za utekelezaji wa miradi ya maendeleo.

Pamoja na hayo Mstahiki Meya amemuagiza Mganga Mkuu wa Manispaa kuhakikisha anavitembelea vituo vyote vya afya na zahanati kwa kuangalia changamoto mbalimbali zilizopo na aweze kuzitatua kwa wakati.

Mstahiki Meya ameyasema hayo kwenye mkutano wa baraza la madiwani wa kujadili taarifa za halmashauri uliofanyika kwenye Ukumbi wa Shule ya Sekondari ya Mtwara Ufundi Agosti 1, 2023.