Wafanyabiashara Soko la Chuno Waombwa kuwa watulivu

Posted on: May 7th, 2021

Mkurugenzi wa Manispaa ya Mtwara-Mikindani  COL. Emanuel Mwaigobeko   amewataka wafanyabiashara wa Soko la Chuno kuwa watulivu  katika kipindi hiki wakati Serikali ikiendelea  kushughulikia  mgogoro kati ya wafanyabiashara  wa soko  la sabasaba na  Manispaa  ili kupisha taratibu za kimahakama zinazoendelea.

Mkurugenzi ametoa rai hiyo  katika kikao chake na wafanyabiashara wa Soko la chuno  kilichofanyika  mapema leo tarehe 7 Mei 2021  katika viunga vya soko la chuno Mkoani lililopo Manispaa ya Mtwara-Mikindani.

Amesema kuwa ,  Serikali inaendelea na taratibu stahiki  za kimahakama katika kushughulikia mgogoro huo na  kesi ipo katika hatua za mwisho, hivyo wafanyabiashara hao wanatakiwa kuwa watulivu  na kuendelea na majukumu yao ya kila siku sokoni  hapo wakisubiria hatma ya  kesi hiyo.

“Naomba nitoe rai ndugu zangu  pamoja na ukimya uliopo  kesi tayari ipo mahakamani  inasikilizwa sio kwamba tumekaa kimya  tunapisha  taratibu za kimahakama hivyo niwaombe  tuwe watulivu wakati taratibu hizo zikifuatwa”alisema Mwaigobeko

Aidha amemtaka mwenyekiti wa soko la chuno Bw. Ally Ndale   kuchukua orodha ya vizimba  vilivyo wazi  (visivyo na biashara)   na  kutafuta utaratibu maalum  wa kuvigawa kwa  wafanyabiashara wa soko hilo ambao wamekosa vizimba ili waweze kuendesha biashara zao kwa maslahi  yao  binafsi na  ya Halmashauri kwa ujumla.

“Nikuagize Mwenyekiti wa  Soko la Chuno, orodhesha  vizimba vilivyo wazi  ambavyo havina biashara na uvigawe kwa wafanya biashara ambao hawana vizimba hatuwezi kuona  vizimba vipo wazi  mwenye chake amestarehe nyumbani wakati mfanyabiashara mwingine anahangaika hana sehemu ya kufanyia biashara’’alisema Mwaigobeko

Naye Mstahiki Meya  wa Manispaa ya Mtwara-Mkindani   Shadida Ndile  amesikitishwa na taratibu zinazoendelea kufanywa na wafanyabiashara wa soko la saba saba  ikiwa na pamoja  na kuleta vurugu  katika maeneo ya soko la Chuno  na amewataka waache mara moja na kujikita Zaidi katika biashara zao wakati  mahakama  ikishughulikia  mgogoro huo.

“Nimesikitishwa na taratibu tunazoendelea nazo wana mtwara, misuguano na migogoro tunayoifanya haina tija  inarudisha nyuma maendeleo katika Manispaa  yetu,mwekezaji hawezi kuja kuwekeza mahali ambapo pana migogoro, tunadumaza maendeleo yetu wenyewe , tujirekebishe  na tuendelee kufanya kazi zetu kwa weledi  kwa manufaa ya Taifa kwa ujumla”alisema Shadida

Awali Mwenyekiti wa Soko la Chuno Bw. Ali Ndale amemshukuru Mkrugenzi wa Halmashauri ya Mtwara-Mikindani kwa kukubali wito wa kuzungumza nao na  kwa niaba ya wafanyabiashara wa soko la chuno ameomba  kupata mrejesho wa kesi kati ya wafanya biashara ya Chuno na Sabasaba.