CCM Mkoani Mtwara yaridhishwa na Utekelzaji wa Miradi ya Maendeleo

Posted on: August 21st, 2021

*Yaagiza Wananchi kuchangia Nguvu kazi katika Utekelezaji wa Ujenzi wa Nyumba za Watumishi Mbae na Mjimwema.

Mweyekiti wa Chama Cha Mapinduzi (CCM) Mkoa wa Mtwara Mhe. Yusufu Namnila ameridhishwa na maendeleo ya miradi mbalimbali ya maendeleo inayoendelea   kutekelezwa katika Manispaa ya Mtwara-Mikindani.

“Nimerizishwa na maendeleo ya miradi inayotekelezwa, japo kuna changamoto kama mbili tatu lakini maendeleo ni mazuri na yanaleta hamasa” Amesema   Mhe. Namnila

Mhe. Mwenyekiti ametoa pongezi hizo 20 Agosti, 2021 katika kikao cha  majumuisho ya  ziara ya Kamati ya Siasa ya Chama cha Mapinduzi (CCM) ilipotembelea miradi ya maendeleo inayotekelezwa katika Manispaa yetu.

Amesema kuwa kasi ya utekelezaji wa miradi hiyo   inaridhisha hivyo amemtaka Mkurugenzi wa Manispaa ya Mtwara-Mikindani COL. Emanuel Mwaigobeko, kuongeza kasi zaidi   ili miradi hiyo ikamilike kwa wakati na wananchi wanufaike na miradi hiyo.

Katika kuunga mkono juhudi za Serikali katika kuboresha miundombinu ndani ya Manispaa yetu, Mhe. Mwenyekiti   amemtaka Mkurugenzi wa Manispaa ya Mtwara-Mikindani kuhamasisha wananchi ili waweze kuchangia nguvu kazi katika ujenzi wa nyumba za watumishi  hasa katika shule ya Msingi Mbae na Mjimwema.

Aidha ameitaka Mamlaka ya Maji safi na Salama Mkoa wa Mtwara (MTUWASA) kuhakikisha inashughulikia changamoto ya maji katika shule ya Msingi mbae, na kurekebisha bili ya maji katika zahanati ya Mbawala Chini.

“Haiwezekani bili ikiwa 800,000 kwa mwezi wakati hakuna matumizi makubwa hapa, bili haiendani na uhalisia wa matumizi nataka mfatilie na mrekebishe”

Miradi iliyotembelewa na Kamati ya Siasa ya  Chama cha Mapinduzi Mkoa wa Mtwara   ni pamoja na  jengo la  mionzi  katika Kituo cha Afya likombe, ujenzi wa Zahanati ya Mbawala Chini, ujenzi wa  madarasa 2 na matundu  11 ya choo Shule ya Msingi Mbae ,ujenzi wa madarasa 4 Shule ya Msingi Mjimwema,ujenzi wa  Chujio la maji  Mangamba pamoja na   upanuzi  wa uwanja wa ndege.