Idara Ya Ardhi Yakabidhiwa PikiPIki Kudhibiti Ujenzi Holela

Posted on: June 16th, 2025

Idara ya Ardhi Manispaa ya Mtwara-Mikindani imekabidhiwa pikipiki mbili zenye thamani ya Shilingi milioni tano laki mbili (5,200,000) kutoka kwenye mapato yake ya ndani ili waweze kusimamia na kudhibiti ukuaji holela wa mji.

Akikabidhi pikipiki hizo kwa niaba ya Mkurugenzi wa Manispaa, Mkuu wa Kitengo cha Mipangomiji na Ardhi, Rugembe Maiga amesema lengo la kuwapatia pikipiki hizo ni kuhakikisha wanasimamia vyema Wananchi wa Manispaa ya Mtwara-Mikindani kuhakikisha wanazingatia taratibu za ujenzi mjini.

Maiga alitumiwa wasaa huo pia kuwashukuru Madiwani wa Manispaa ambao ndiyo walipendekeza ununuzi huo na amemshukuru Mkurugenzi wa Manispaa ya Mtwara-Mikindani Mwalimu Hassan Nyange kwa kuridhia kutoa fedha za kununua pikipiki hizo ambazo zitawezesha wataalamu kufanya ukaguzi wa mara kwa mara ili kudhibiti  ujenzi holela na kuhakikisha kuwa ujenzi wowote unaofanyika ndani ya Manispaa unakidhi matakwa ya kisheria kwa kuwa na nyaraka  za umiliki (Hatimiliki) na kibali cha ujenzi.

Vilevile amesema Kufuatia kupatikana kwa pikipiki hizo kutapunguza kwa kiasi kikubwa migogoro ya ardhi ikiwemo migogoro ya uvamizi wa maeneo ya Umma na migogoro ya kutotii sheria zinazosimamia masuala ya uendelezaji wa ardhi kwani wataalamu sasa wataweza kuzunguka maeneo mengi zaidi.