CCM Mtwara Yaridhishwa na Ujenzi wa Hospitali ya Wilaya Mjimwema

Posted on: July 3rd, 2023

Kamati ya siasa ya Chama Cha Mapinduzi (CCM) Mkoa wa Mtwara ikiongozwa na Mwenyekiti wake Ndugu Said Nyengedi Julai 3, 2023 imefanya ziara ya ukaguzi wa maendeleo ya ujenzi wa hospitali ya Wilaya inayojengwa mtaa wa Mjimwema  na kuridhishwa na maendeleo ya utekelezaji wa mradi huo.

Pamoja na kuridhishwa na ujenzi huo Mwenyekiti  wa Chama hiko Mkoa wa Mtwara Saidi Nyengendi ameitaka Manispaa kuhakikisha inajenga nyumba za watumishi  kwenye hospitali  hiyo ili kurahisisha upatikanaji wa huduma kwa haraka pale inapotokea dharura.

Hospitali ya Wilaya ya Mjimwema inajengwa kwa gharama ya Shilingi Milioni mia tano (500,000,000) fedha za awamu ya kwanza ambazo zimetolewa na Serikali Kuu kwa ajili ya ujenzi wa jengo la kuhudumia wagonjwa wa nje (OPD), maabara na kichomea taka.

Ujenzi wa hospitali hiyo unalenga kuimarisha utoaji wa huduma bora za afya ndani ya Manispaa, kusogeza upatikanaji wa huduma za afya, lishe na za ustawi wa jamii karibu na wananchi pamoja na kupunguza idadi ya vifo vya akina mama wajawazito, Watoto wachanga na waatoto walio na umri wa chini ya miaka mtano.

Aidha ujenzi huo kwa sasa upo kwenye hatua ya ufungaji wa Lenta  na mradi unatarajia kukamilika ifikapo Septemba 30, 2023.