DC Kyobya amuagiza Mkurugenzi Kuharakisha Ununuzi vya Ujenzi Zahanati ya Ufukoni

Posted on: November 4th, 2021

Baada ya Zahanati ya Ufukoni kupokea fedha kutoka Serikali kuu   kiasi cha Tshs 250,000,000 kwa ajili ya Upanuzi wa Zahanati hiyo kuwa Kituo cha Afya, Mkuu wa Wilaya ya Mtwara Mhe.  Dunstan Kyobya amemuagiza Kaimu Mkurugenzi wa Manispaa ya Mtwara-Mikindani Bi. Tamko Ally kuharakisha  mchakato wa  ununuzi wa vifaa  kwaajili ya ujenzi wa miundombinu  ya  Zahanati hiyo      ili kukamilisha  ujenzi  huo kwa wakati.

Amesema kuwa    ucheleshwaji wa ununuzi wa vifaa utapelekea ujenzi huo kutokamilika kwa wakati   na kusababisha adha kwa   wananchi  kuendelea kufuata huduma katika maeneo mengine.

Mhe. Kyobya ametoa rai hiyo  Novemba 4,2021  katika Ziara ya Kamati ya  Ulinzi na Usalama ya Wilaya  ilipotembelea  kukagua Utekelezaji wa Ujenzi wa Madarasa katika Manispaa yetu.

Aidha amewataka wananchi kujitokeza kwa wingi na kushiriki kikamilifu katika ujenzi huo ili kuiongezea nguvu Serikali.

 “Kama tulivyoshirikiana katika miradi mingine nawaomba tujitokeze kushiriki kimamilifu maana hiki Kituo cha Afya ni cha sisi wananchi”Amesema Kyobya

 Kwa upande wake Kaimu Mkurugenzi wa Manispaa ya Mtwara-Mikindani Bi. Tamko Ally amemhakikishia Mhe. Kyobya kuwa mchakato wa un ununuzi wa vifaa vya ujenzi utaharakishwa  kama alivyoagiza.

Bi. Salima Namenya Mkazi wa Kata ya Ufukoni amemshukuru Rais wa Jamhuri ya Mhungano wa Tanzania Mhe. Samia Suluhu Hassan kwa kutenga fedha  za upanuzi wa Zahanati ya Ufukoni kuwa  Kituo cha Afya   kwani Kituo hicho kitapanua wigo katika utoaji wa huduma za Afya.