Kamati Za Ujenzi Zashauriwa Kununua Vifaa Vya Ujenzi Viwandani

Posted on: November 4th, 2021

Ikiwa zimepita siku 25 tangu Uzinduzi wa Mpango wa Maendeleo kwa Ustawi na Mapambano dhidi ya UVIKO-19 ambapo Manispaa ya Mtwara- Mikindani ilipokea kiasi cha Tsh.440,000,000 kwa ajili ya ujenzi wa  vyumba 22 vya madarasa  kwa shule za Sekiondari,  Mkuu wa Wilaya ya Mtwara Mhe. Dunstan Kyobya amewataka wajumbe wa  Kamati za manunuzi katika ujenzi huo kuhakikisha wananunua  vifaa vya ujenzi kutoka viwandani ili kupunguza gharama za ujenzi.

Amesema kuwa ununuzi wa bidhaa kutoka viwandani unazingatia ubora na  unapunguza gharama zisizo na msingi ambapo fedha hizo zinaweza kuelekezwa katika miradi mingine.

“Ukinunua bidhaa toka viwandani inapunguza gharama na pia unaweza kusevu hela ambayo unaweza kuitumia katika miradi mingine mfano hata ujenzi wa ofisi za walimu” Amesema Kyobya

Mhe. Kyobya ametoa rai hiyo  Novemba 4,2021  katika Ziara ya Kamati Kuu ya Mkoa wa Mtwara ilipotembelea  kukagua na kupokea taarifa ya  utekelezaji wa vyumba vya  madarasa vinavyojengwa  kupitia Mpango wa Ustawi wa Taifa na Mapambano dhidi ya UVIKO-19 katika Manispaa Yetu.

Aidha amewataka wajumbe hao kuzingatia ubora katika ununuzi wa vifaa vya ujenzi lakini pia    kushirikiana katika utendaji wao   ili kurahisisha utekelezaji wa majukumu yao katika ujenzi huo.

Kwa Upande wake Kaimu Mkurugenzi wa Manispaa ya Mtwara-Mikindani Bi. Tamko Ally amesema kuwa tayari ofisi yake imeshaanza utekelezaji wa  ununuzi wa vifaa vya ujenzi toka viwandani ambapo saruji inayotumika katika ujenzi huo imeagizwa kutoka  katika kiwanda cha saruji Dangote.

Naye Mstahiki Meya wa Manispaa ya Mtwara-Mikindani amemshukuru Rais wa Jamhuri ya Muungano wa Tanzania Mhe. Samia Suluhu Hassan na  amemhakikishia  kuwa madarasa hayo yatakamilika ndani ya muda uliopangwa.

Kamati hiyo imetembelea Ujenzi wa vyumba vya madarasa Sekondari ya Sabasaba,Bandari, Shangani,Chuno,Magomeni ,Mitengo  Mangamba na Naliendele pamoja na Shule ya Msingi  Mitengo na Kamabarage,

Pia imetembelea  Ujenzi wa nyumba ya Mganga Zahanati ya Rwelu na Ujenzi wa Jengo la kujifungulia Zahanati ya Ufukoni pamoja na  Upandaji miti iyopo chini ya mradi wa Kaya Maskini TASAF.