Kivuko cha M.V Mafanikio Kuhudumia hadi saa 2 Usiku badala ya saa 12 jioni

Posted on: October 5th, 2021

Mkuu wa Mkoa wa Mtwara Brig. Jen Marco Gaguti ametoa agizo la kivuko MV Mafanikio kinachofanya safari zake kuanzia Feri hadi Msangamkuu kuwa  kuanzia  Oktoba 4, 2021 Kivuko hiko   kitahudumia wananchi  hadi  saa mbili usiku badala ya saa 12 jioni  ili  kuruhusu wananchi hao kupata muda zaidi  katika shughuli zao za kila siku.

“Kumekuwa na changamoto ya suala la muda na mmeomba muda uongezwe, tumeridhia kivuko hiki sasa kifanye kazi mpaka saa mbili usiku”Amesema Gaguti

Mhe. Gaguti ametoa agizo hilo Oktoba 4, 2021 wakati wa mapokezi ya kivuko cha MV. Mafanikio kilipowasili Mkoani Mtwara baada ya   kufanyiwa ukarabati ambao umegharimu kiasi cha shilingi Mil 493,609,357.70.

Aidha amewataka wananchi hao kuhakikisha wanalipa kodi kwa  usahihi na wakati ili Serikali iweze kuwekeza na  kuleta miradi mbalimbali ya maendeleo katika Mkoa wa Mtwara.

“Tujitahidi kulipa kodi hii miradi inayoendelea kutekelezwa katika Mkoa wetu  inahitaji uwekezaji wa kutosha, kodi zetu zina tija katika kuleta maendeleo” Amesema Gaguti

Naye Mtendaji Mkuu wa TEMESA  Mkoa wa Mtwara Eng. Japhet Msellu   amesema kuwa  kivuko hicho kimefanyiwa ukarabati wa injini na baadhi ya vifaa  ambapo  matengenezo yote  yamegharimu kiasi cha shilingi Milioni  493,609,357.70  pamoja na ongezeko la VAT.

Nae Mbunge wa Jimbo la Mtwara Mjini Mhe. Hassani Mtenga amewataka wananchi kutofanya uharibifu katika miundombinu ya kivuko hicho kwani uharibifu huo  utakwamisha shughuli mbalimbali za maendeleo katika jamii.

Bakari Omari Ally  mkazi wa  Msanga Mkuu ameishukuru Serikali kwaajili ya ukarabati  huo  kwani kina usalama zaidi  katika matumizi tofauti na mitubwi ambayo inatumika  kwa sasa.