Kodi Kuendelea kukusanywa soko la Saba Saba

Posted on: May 7th, 2021

Mkuu wa Wilaya ya  Mtwara Mhe. Dunstan Kyobya  amemtaka Mkurugenzi wa Manispaa ya Mtwara Mikindani  COL. Emanuel  Mwaigobeko kuendelea kukusanya  mapato katika Soko la Sabasaba wakati taratibu za kimahakama kuhusiana na mgogoro kati ya soko la sabasaba na Mkurugenzi  wa Manispaa ya Mtwara Mikindani  zikiendelea.

Mkuu wa Wilaya ametoa agizo hilo  leo Mei 7,2021 alipozungumza  na wafanya biashara wa soko la Sabasaba  kilichofanyika  katika   viwanja vya  Sabasaba vilivyopo Manispaa ya Mtwara-Mikindani.

“ Nimesikia kuna watu wanazuia ukusanywaji wa kodi,  nakuagiza Mkurugenzi taratibu za  Halmashauri ziendelee kama kawaida, kodi iendelee kukusanywa , kama kuna mtu ana malalamiko yoyote afate taratibu atasikilizwa , mtu akizuia ukusanywaji wa kodi tutamshughulikia”

  Makusanyo ya kodi ndio yanayoendesha shughuli  katika Manispaa yetu, sasa anatokea mtu mmoja au kikundi kinashawishi wafanya biashara wasilipe kodi, haitawezekana ,sitaweza kuona  maendeleo ya Manispaa hii yanakwamishwa na watu wachache”amesema Kyobya

Aidha amewataka wafanyabiashara hao kuendeleza vizimba vyao vya biashara vilivyopo katika soko la Chuno,  kushindwa kufanya hivyo kutamlazimu Mkurugenzi  kugawa vizimba hivyo kwa wafanya biashara wengine ambao wamekosa vizimba katika Soko hilo  ili  waweze  kuendeleza  biashara zao.

Mwisho amewataka wafanyabiashara hao  kushirikiana katika kulinda usalama wa raia kwa kuepuka kutoa ushawishi wa  ugomvi na visasi baina yao na kutoa taarifa kwa vyombo  husika pindi  wanapoona   kuna  uvunjifu wa amani.