Mhe. Mtenga aahidi kujenga barabara za lami kila Kata

Posted on: October 8th, 2021

Mbunge wa Jimbo la Mtwara Mjini Mhe. Hassani Mtenga amehaidi  ndani ya miaka mitano  kujenga  barabara za lami  kwa kushirikiana  na TARURA  katika kila Kata  ndani ya   Manispaa ya Mtwara- Mikindani  ili kuondoa  adha zitokanazo na  ukosefu wa barabara za rami   ikiwemo mafuriko.

“TARURA mnanisikia katika bajeti ijayo tukae mezani tuone tunafanyaje  Mwenyezi Mungu akitujalia ndani ya Miaka mitano tunahitaji kila Kata tufungue barabara za rami” Amesema Mtenga

Mhe. Mtenga ametoa  ahadi  hiyo Oktoba 7, 2021 katika Mkutano wa  hadhara  uliofanyika katika Kata ya Mtonya iliyopo Tarafa ya Mikindani.

Amesema kuwa ukosefu wa barabara za rami katika Kata na Mitaa zinapelekea kuwepo kwa changamoto mbalimbali katika jamii ziwemo mafuriko na adha ya  usafirishaji  hasa katika kipindi cha masika.

Ili kutatua changamoto na kuleta maendeleo katika Kata zote zilizopo Mhe. Mtenga amewataka Madiwani na Watendaji wa Serikali za Mitaa kushirikiana  kwa pamoja  katika utekelezaji  wa majukumu yao.

“Rai yangu kwa Watendaji wa Serikali za Mitaa na Madiwani msiwe walalamishi shirikianeni katika  majukumu yenu  mliopewa” Amesema Mtenga

Amesema kuwa  maendeleo ndani ya  Kata  yanaletwa  na  ushirikiano baina yao   hivyo amewataka  kutatua changamoto zilizopo kwa pamoja   ili kuleta maendeleo.

Aidha Mhe. Mtenga amewataka Watendaji hao   kuhakikisha wanakuwa na utaratibu wa kufanya mikutano ya hadhara ili kusikiliza kero za wananchi na kuzitolea utatuzi.

Akimuwakilisha Mkuu wa Wilaya ya Mtwara, Kaimu Katibu Tawala wa Wilaya Bw. Said Mshamu  Kayangu  amempongeza Mhe. Mtenga kwa kuwa mstari wa mbele katika kuleta maendeleo katika Manispaa yetu na  kupigania haki za  wananchi wake.