Michezo Yetu, Fursa Kwetu

Posted on: May 30th, 2021

Mkuu wa Wilaya ya Mtwara Mhe.  Dunstan Kyobya amezindua ligi  ya  mpira wa miguu Ndile MEYA  CUP pamoja na viwanja vya  michezo  katika Taasisi ya utafiti wa mazao ya kilimo (TARI)   vilivyopo katika Kata ya Naliendele Mkoani Mtwara ,  huku akisisitiza    vijana    kutumia fursa hiyo   kuonesha vipaji vyao katika  kutafuta njia ya kuelekea kwenye timu kubwa.   

Hii ni fursa, tutumie fursa hii  kuleta maendeleo katika Kata yetu na Mkoa wetu  kwa ujumla, onesheni vipaji vyenu ili vionekane  ,  Michezo hii italeta fursa nyingi  hapa , watu watakula watakunywa , tutumie fursa hii kwa umakini ili mashindano haya yalete tija kwa kila mmoja wetu” Alisema Kyobya

Akizungumza katika uzinduzi huo uliofanyika  tarehe 30/05/2021 katika viwanja vya TARI Naliendele,  Kyoba  aliwashukuru wadhamini  mbalimbali  walijitokeza  na kutoa rai   kwa wadau wengine kuendeleza uzalendo   wa   kudhamini michezo mbalimbali   ikiwa ni njia moja wapo ya kuibua wachezaji  wengi chipukizi.

Naye Mstahiki Meya wa Manispaa ya Mtwara -Mikindani  Bi. Shadida Ndile,  amewashukuru wadhamini na wadau walijitokeza na amewataka wananchi  wa Mtwara Mikindani kuwa wazalendo  na  kushiriki michuanao hiyo kwa  amani na kuepuka vurugu  na migongano isiyo ya lazima itakayopelekea uvunjifu wa amani wakati michuano hiyo ikiendelea.

"Sitegemei vurugu na migongano, nategemea mashindano ya amani, haya mashindano ni yetu, naomba tucheze kwa upendo na uzalendo, tukiharibu  tutawafukuza  wadhamini wenyewe,   tujitahidi kuyalinda” Alisema Ndile.

Aliongeza kuwa badala ya kukaa kijiweni na kujihusisha na matumizi ya madawa ya kulevya , vijana watumie fursa hii    ili  kuingia katika soko la ajira  kwani ndoto yake kubwa ni   kuona vijana hao wanafika mbali  kimichezo na  kuunda timu ya Manispaa ya Mtwara Mikindani, kuingia katika timu ya Mkoa   na hata kupata fursa  nje ya nchi.

Mashindano hayo yamezinduliwa   tarehe 30 , mei 2021 na  yatamalizika  tarehe 11, julai 2021 katika viwanja vya Nangwanda  Sijaona  vilivyopo  Manispaa ya Mtwara- Mikindani .

Ligi hiyo  itashirikisha  timu za mpira wa miguu 18 zilizoundwa kutoka katika Kata 18 zilizoundwa kutoka katika  Kata 18  zilizopo Manispaa ya Mtwara Mikindani.