Mkurugenzi aagiza Shule kuanzisha klabu za kupinga Mimba

Posted on: July 26th, 2018

Mkurugenzi wa Manispaa ya Mtwara-Mikindani Bi Beatrice Dominic   Julai 26,2018 ametembelea Shule ya Sekondari ya Mitengo na kuagiza Shule zote za Sekondari za   Manispaa kuunda klabu za kupinga mimba shuleni.

Amesema kuwa uundaji wa klabu hizo ambazo zitawahusisha wanafunzi wa kike zitasaidia kuwapa elimu mbalimbali za Maisha pamoja na kuwapa nafasi wanafunzi hao kuelezea changamoto wanazokutana nazo ili ziweze kutatuliwa   mapema na walimu wao au Ofisi ya Mkurugenzi wa Mnaispaa kwa lengo la   kuokoa Maisha yao.

 Pamoja na agizo hilo Mkurugenzi pia amewataka walimu kuwa na utamaduni wa kupima mimba wanafunzi angalau mara mbili kwa muhula mmoja ili kuondoa uwezekano wa mwanafunzi kuzalia shuleni kama uzoefu unavyoonesha sehemu zingine ambazo matukio hayo yamewahi kutokea.

Aidha Beatrice amewataka wanafunzi hao kusoma kwa bidii, kuzingatia masomo yao na kujiepusha na mambo yasiyofaa ambayo yataharisha Maisha ikiwemo mapenzi ya utotoni yatakayopelekea kuacha masomo.

“Someni, achaneni na wanaume, wanaume hawalipi kinacholipa ni kitabu ,mimba ni adui wa Maendeleo nendeni mkasome”alisema Beatrice

Pia ameongeza kuwa yeye pamoja na wakuu wa idara watatembelea Klabu zote na kuzungumza na wanafunzi wa kike kwa lengo la kuwatia moyo na kupunguza au kuondoa tatizo la mimba shuleni.