Mkuu wa Shule Mtwara-Ufundi apongezwa Kuwashirikisha Wanafunzi kwenye Ujenzi

Posted on: November 4th, 2021

Mkuu Wa Wilaya ya Mtwara Mhe. Danstan Kyobya amempongeza Mwalimu  Mkuu wa Shule ya Ufundi Mtwara  kwa kutumia ubunifu wa    kuwashirikisha wanafunzi wa shule hiyo katika ujenzi wa vyumba vya  madarasa 2 vinavyojengwa shuleni hapo  kupitia Mpango wa Ustawi wa Taifa na Mapambano dhidi ya UVIKO-19.

“Nikupongeze huu ni ubunifu mkubwa umeonesha, hawajifunzi tu kwa vitendo lakini  wamepata somo  la kuwa wazalendo” Amesema Kyobya

Mhe . Kyobya ametoa pongezi hizo Novemba 4,2021  katika Ziara ya Kamati Kuu ya Mkoa wa Mtwara ilipotembelea  kukagua na kupokea taarifa ya  utekelezaji wa madarasa yanaoyojengwa kupitia Mpango wa Ustawi wa Taifa na Mapambano dhidi ya UVIKO-19 katika Manispaa ya Mtwara-Mikindani.

Amesema kuwa   ubunifu huo ni funzo kubwa la ushirikishwaji wa wananchi na kusisitiza kuwa  ushirikishwaji wa wanafunzi hao   hautaathiri ubora wa madarasa hayo kwa kuwa kuna wataalam wanaosimamia  ujenzi huo.

Ili kukamilisha madarasa hayo kwa wakati na kwa ubora unaohitajika Mhe. Kyobya amemtaka Diwani wa Kata ya Shangani Mhe.  Abuu Mohamedi  kuendelea kutoa  hamasa kwa wananchi wa Kata hiyo ili kushiriki  katika ujenzi huo.

Kwa Upande wake Diwani wa Kata ya Shangani Mhe.  Abuu Mohamed amemhakikishia Mhe. Kyobya kumaliza ujenzi wa madarasa hayo ndani ya Muda  uliopangwa na katika ubora zaidi.

Naye Mwalimu Mkuu wa Shule ya Sekondari Bandari Bi. Amina Bakari amewashukuru wananchi wa Kata ya Reli kwa ushiriki wao na amewataka kujitokeza  zaidi katika hatua zinazofata.

Naye Asha Jumanne Mwanafunzi wa Kidato cha Pili katika Shule ya   Ufundi Mtwara amemshukuru  Rais Wa Jamhuri ya Muungano wa Tanzania Mhe. Samia Suluhu Hassani kwa kupunguza changamoto ya madarasa katika Shule  yao.

Kamati hiyo imetembelea Ujenzi wa vyumba vya madarasa Sekondari ya Sabasaba,Bandari, Shangani,Chuno,Magomeni ,Mitengo  Mangamba na Naliendele pamoja na Shule ya Msingi  Mitengo na Kamabarage,

Pia imetembelea  Ujenzi wa nyumba ya Mganga Zahanati ya Rwelu na Ujenzi wa Jengo la kujifungulia Zahanati ya Ufukoni pamoja na  Upandaji miti iyopo chini ya mradi wa Kaya Maskini TASAF.