Msimamizi Wa Uchaguzi Awahamasisha Wananchi Kushiriki Uchaguzi wa Serikali za Mitaa

Posted on: September 30th, 2024

Msimamizi wa Uchaguzi Manispaa ya Mtwara-Mikindani Mwalimu Hassan Nyange amewahamasisha  wananchi wote wenye umri unaoanzia kuanzia  miaka  kumi na nane(18) na kuendelea kushiriki kikamilifu kwenye Uchaguzi  wa Serikali za Mitaa  ikiwemo Kujiandikisha kwenye Daftari la Wapiga Kura  katika vituo vitakavyotangazwa hapo baadae.

Amesema kuwa zoezi la Uandikishaji litaanza rasmi Oktoba 11 na litakamilika Oktoba 20,2024

Aidha Mwalimu Nyange amesema  kuwa Manispaa  imeandaa bonanza la mchezo wa mpira wa miguu la watumishi kati ya watumishi ambao ni mashabiki wa timu za Simba na Yanga ili kuleta hamasa na Umoja kuelekea  Uchaguzi  wa Serikali za Mitaa.

Amebainisha kuwa bonanza hilo litafanyika  siku ya kumbukizi ya kifo cha Baba wa Taifa Oktoba 14, 2024 (Nyerere Day) katika  Viwanja  vya Nangwanda Sijaona.

Mwalimu Nyange ameyasema hayo  Septemba 29, 2024 kwenye  fainali ya tamasha la Michezo la Mtonya ( MTONYA FESTIVAL) lililofanyika katika viwanja vya ghala la kuhifadhia Korosho katika Kata hiyo.