Mstahiki Meya awataka Washiriki Kikao Cha UVIKO-19 kuhamasisha Jamii juu ya Ugonjwa huo

Posted on: October 3rd, 2021

Mstahiki Meya wa Manispaa ya Mtwara -Mikindani Mhe. Shadida Ndile amewataka  washiriki wa  kikao cha Uhamasishaji wa Mpango  Harakishi wa chanjo ya  COVID -19  kuhakikisha wanashirikiana kwa pamoja  katika kuelimisha jamii juu ya umuhimu wa chanjo ya  UVIKO -19  ili  kudhibiti  kuenea kwa ugonjwa huo katika Manispaa yetu.

“Serikali imewaamini nendeni mkashirikiane   katika kuhakikisha elimu hii  inaifikia jamii husika ili tuweze kudhibiti ugonjwa huu” Amesema Ndile

Mhe. Ndile  ametoa rai hiyo  Oktoba 2, 2021   katika  kikao cha Uhamasishaji wa Mpango  Harakishi wa chanjo ya  COVID -19   kilichoshirikisha   Madiwani, Wenyeviti wa Serikali za Mitaa, Watendaji Kata na wa   Mitaa , Maafisa maendeleo ya Jamii  pamoja na  Maafisa Afya Kata wa  Manispaa ya Mtwara - Mikindani.

Amesema kuwa elimu hiyo ikitolewa kwa umakini na  usahihi  itaondoa  imani potofu ambazo zinaendelea kusambazwa katika jamii juu ya madhara yatokanayo na chanjo ya UVIKO -19.

Sambamaba na hili amewataka washiriki hao wasikate tamaa watakapokutana na changamoto katika jamii wakati wa  zoezi la  uhamasishaji kwani  kwenye mafanikio daima kuna changamoto

Kwa upande wake Mbunge wa Jimbo la Mtwara Mjini Mhe. Hassani Mtenga amewataka washiriki hao kuendeleza jitihada dhidi ya mapamabano ya ugonjwa wa UVIKO -19 ili jamii yetu ibaki salama.

Naye Mratibu wa Kuthibiti Ukimwi Wilaya Nae Dkt. Lusungu Mselela   amesema   kuwa lengo la kikao hicho ni kutoa elimu ya UVIKO -19 kwa washiriki hao    ambayo ikitumiwa kwa usahihi itazuia   maambukizi mapya ya ugonjwa wa UVIKO -19.

Bi. Zuhura Musa ambae ni mshiriki wa  kikao hicho, ameishukuru Serikali kwa kuratibu  mafunzo hayo kwani kwa kupitia elimu hiyo iliyotolewa ameongeza maarifa zaidi juu ya UVIKO -19.