Mwalimu nyange Ahaidi Kutoa Mil.10 Ujenzi wa Bweni Rahaleo Sekondari

Posted on: October 12th, 2024

Mkurugenzi wa Manispaa ya Mtwara-Mikindani Mwalimu Hassan Nyange ameahidi kuchangia fedha shilinhi  milioni kumi (10,000,000) kwa ajili ya Ujenzi wa bweni la kulala wanafunzi wa kike wakati wa kambi katika Shule ya Sekondari Rahaleo

Akizungumza katika sherehe ya kuhitimu kidato cha nne  Oktoba 10,2024 katika viwanja vya Shule hiyo Mwalimu Nyange amesema kuwa lengo la kutoa fedha hizo ni kuunga mkono jitihada za kitaaluma zinazofanywa na shule hiyo kwa matokeo mazuri ya ufaulu wa mitihani ya Taifa ya kidato cha pili na cha nne kwa miaka minne mfululizo.

Nyange amesema kuwa ataandaa utaratibu wa kupita katika Kila Kata kufanya  mikutano na wazazi na walezi wa wanafunzi  kwa ajili ya kuweka mikakati  ya kuondoa ufaulu wa daraja la nne na sifuri kwa kidato cha nne na kukumbushana suala la malezi kwani malezi bora ndio chanzo Cha ufaulu Kwa mwanafunzi.

Amesema kuwa ifikapo mwaka 2025 atachangia chakula kwa miezi mitatu ya awali kwa shule tano zitakazofanya vizuri katika matokeo ya mtihani wa Taifa kidato cha nne.

Aidha ametumia fursa hiyo kuwakumbusha wazazi waliohudhuria katika mahafali hayo kuhakikisha wanajiandikisha katika orodha ya majina ya wapiga kura na kushiriki uchaguzi wa Serikali za Mitaa ifikapo  Novemba 27,2024.

Nyange amewapongeza wahitimu hao na kuwataka kujiandaa na kufanya vizuri katika mtihani wa Taifa wa kidato cha nne.

Kwa upande  wake Mkuu wa Shule hiyo Mwalimu Julius Mkuwele amemshukuru Mkurugenzi wa Manispaa  hiyo  kwa kutatua  changamoto ya kuvuja kwa baadhi ya madarasa na upungufu wa viti na madawati  shuleni  hapo.