PSSSF Yawahimiza Watumishi Mtwara-Mikindani Kuweka Mipango ya Kustaafu Mapema

Posted on: September 14th, 2022

Meneja wa mfuko wa hifadhi ya Jamii kwa watumishi wa umma (PSSF) Kanda ya Kusini Bwana Sayi Lulyalya  amewasisitiza  watumishi Manispaa  ya Mtwara-Mikindani kuweka mipango ya kustaafu mapema kwa kutunza akiba ya fedha kila mwezi kutoka kwenye mshahara ili kujiwekeza kwenye kufanya mambo mbalimbali ya maendeleo ikiwemo ujenzi wa nyumba badala ya kutegemea fedha za mafao ya kustaafu kufanya mambo hayo.

Ameyasema hayo Leo Septemba 13,2022 kwenye kikao cha utoaji wa elimu ya kikokotoo cha mafao ya kustaafu kilichofanyika katika ukumbi wa chuo cha Ualimu kawaida.

Aidha amewataka watumishi hao kujenga utamaduni wa kupitia taarifa zao za michango kila mara ili kuona kama michango hiyo iko sahihi na kuepusha usumbufu pale muda wa kustaafu unakapofika.

Akizungumza kuhusu faida za Kanuni mpya za kikotoo kwa watumishi wa Umma Lulyalya amesema kuwa kanuni hiyo inaongeza kiwango cha mkupuo kutoka asilimia 25 iliyolalamikiwa mwaka 2018 hadi asilimia 33 huku pensheni ya mwezi ikiongezeka kutoka asilimia 50 ya sasa hadi asilimia 67 ya wanachama wa PSPF na LAPF.

Faida nyingine ni pamoja na kanuni hiyo kuweka uwiano na usawa wa mafao baina ya wastaafu wote, itafanya mifuko kuwa imara na endelevu pamoja na kupanda  kwa malipo ya mkupuo kwa asilimia 81 ya wanachama na malipo ya pensheni kuongezeka kwa asilimia 19.

Kwa upande wake Bwana. Ephraim Mutkyahwa ameishukuru Serikali kwa kutoa  ufafanunuzi wa kikokotoo kwani imeondoa sintofahamu walizokuwa wanazisikia na kwamba ameipongeza Serikali kwa kuweka maslahi mazuri ambayo yakitekelezeka italeta ahueni kwa wastaafu.