Serikali Yafanya Mabadiliko ya Utoaji wa Mikopo, Sasa Kutumia Mfumo wa TPLMISS

Posted on: June 30th, 2022

Ili kuondoa udanganyifu uliokuwa unafanyika kwenye uombaji wa mikopo  ya asilimia kumi inayotolewa na mamlaka za serikali za mitaa kupitia mapato yake ya ndani hapa nchini, Serikali imefanya mabadiliko ya utoaji wa mikopo hiyo kwa kuanzisha  mfumo wa kielektroniki wa  utoaji wa mikopo ujulikanao kama Ten Percent loan management information system (TPLMISS)

Mfumo huo ulioanzishwa unawataka wanakikundi  wanaotaka mikopo kuingia  wenyewe kwenye mfumo na kujaza fomu za uombaji wa mikopo.

Hayo yamebainishwa Juni 30 ,2022 na Mkuu wa Idara ya Maendeleo ya jamii Manispaa ya Mtwara-Mikindani Bi .Juliana Manyama  kwenye kikao kazi na wenyeviti wa  serikali za Mitaa wa Manispaa ya Mtwara-Mikindani  kilichofanyika katika Ukumbi wa Call nd Vision.

Manyama  amesema kuwa mfumo huo ulioanzishwa hauondoi taratibu za awali za uombaji wa mikopo na kuwataka washiriki wa kikao kuhamasisha wananchi wao kujiandikisha NIDA ili waweze kupata vitambulisho vya Taifa kwa kuwa kwenye mfumo ulioanzishwa kipo kigezo cha uwepo wa Kitambulisho cha taifa kwa kila mtu anayeomba mkopo.

Kutokana na uwepo wa deni kubwa la mikopo ambalo Manispaa inadai kwa  wananchi waliopewa mikopo na hawajarejesha,  Manyama amewataka Wenyeviti wa Mitaa kusaidiana na Serikali katika kuwakumbusha wananchi waweze kurejesha fedha hizo ili wananchi wengine waweze kukopa.

Nae Mhagama Afisa wa Taasisi ya Kuzuia na Kupambana na rushwa amewataka wenyeviti hao kujiepusha na rushwa kwnye zoezi zima la upitishaji wa fomu za maombi ya mkopo kwa watu wasio na sifa.