Viongozi Wa Kata ,Mitaa Watakiwa Kutoa Hamasa ya Sensa

Posted on: August 16th, 2022

Mkuu wa Wialya ya Mtwara Mhe. Dunstan Kyobya akizungumza na Viongozi wa Kata na Mitaa kuhusu kutoa hamasa ya sensa  kwenye maeneo yao

Ikiwa zimesalia takribani siku saba ili zoezi la sensa ya watu na makazi liweze kufanyika hapa nchini, Mkuu wa Wilaya ya Mtwara Mhe. Dunstany  Kyobya  ametoa wito kwa  viongozi wa  kata na mitaa yote iliyopo  Manispaa ya Mtwara – Mikindani  kuhakikisha wanashiriki kikamilifu katika zoezi hilo na kufanya hamasa kubwa ili wananchi waweze kujitokeza kuhesabiwa.

“Mkafanye hamasa bila woga katika siku chache zilizosalia, hasa katika maeneo yenye mikusanyiko ya watu wengi kama vile makanisani, misikitini, katika vijiwe vya bodaboda  na maeneo mengine ambayo sikuweza kuyataja’amesisitiza Mhe. Kyobya.

Amesema kuwa viongozi hao  ndio wafanikishaji wakubwa  wa zoezi la sensa hivyo wanapaswa kujua kaya  zote katika maeneo yao pamoja  na  kujua changamoto za watu ili kurahisisha zoezi hilo

Mkuu wa Wilaya ametoa  wito huo  leo Agosti 16,2022 kwenye kikao cha uhamasishaji wa sensa ya watu na makazi  kilichofanyika katika  ukumbi wa shule ya sekondari ya ufundi Mtwara kikihusisha madiwani, watendaji wa kata , watendaji wa mitaa na wenyeviti wa mitaa..

Aidha amewataka Wenyeviti wa mitaa kutoa ushirikiano  kwa makarani wa sensa watakaofanya kazi ya kukusanya taarifa za watu na makazi ili kurahisisha upatikanaji wa taarifa sahihi na kwa wakati.

Kwa upande wake  Mratibu wa sensa Mkoa wa Mtwara Bi. Tamali William amewasisitiza viongozi hao kuendelea kutoa hamasa kwa wananchi ili Mkoa wetu wa Mtwara upate miradi mbalimbali na Manispaa yetu iweze kukua na kupewa hadhi ya kuwa jiji.

Sensa ya watu na makazi hufanyika hapa  nchini kila baada ya miaka kumi na mwaka huu sensa ya watu na makazi inatarajia kufanyika ifikapo Agosti 23.