Wahudumu wa afya hospitali ya rufaa watakiwa kutoa huduma bora

Posted on: October 1st, 2021

Mkuu wa Mkoa wa Mtwara Brig. Jen Marco Gaguti   amewataka  watendaji na   watoa huduma wa Hospitali ya  Rufaa Kanda ya Kusini kuhakikisha   wanatoa huduma bora   ili kuendana  na   matarajio ya Serikali na  wananchi kwa ujumla.

“Dhamana mliopewa ni kubwa, Serikali imewaamini na kuwapa nafasi kuhudumu katika Hospitali hii, msiwavunje moyo wananchi toeni huduma kwa kuzingatia ubora” Amesema   Gaguti

Mhe. Gaguti ametoa rai hiyo Oktoba 1, 2021 wakati wa ziara yake ya kukagua utekelezaji wa agizo la ufunguzi na kuanza kwa huduma katika Hospitali ya Rufaa Kanda ya Kusini.       

Wakati huo huo Mhe. Gaguti amewataka wananchi wa Mkoa wa Mtwara  kuitumia  Hospitali hiyo kama daraja  la  kukuza uchumi binafsi kwakuwa  uwepo wa hospitali hiyo    utafungua  fursa mbalimbali  za kiuchumi  katika Mkoa wa Mtwara na Taifa kwa ujumla.

“Tuitumie hospitali hii kama daraja la kufanikiwa, huduma za kijamii zitaongezeka katika maeneo haya hospitali hii itafungua fursa mbalimbali   katika Mkoa wetu” Amesema  Gaguti

Naye Naibu Meya wa Manispaa ya Mtwara- Mikindani  Said Nassoro ameishukuru Serikali kwa  ujenzi wa hospitali hiyo  kwakuwa  hospitali hiyo  itaimarisha  afya za  wananchi    pia pato la Manispaa  yetu litapanda.    

Naye  Kaimu Mganga Mkuu wa Mkoa  Dkt. Mohamedi Kodi  amesema kuwa Hospitali hii imerahisisha upatikanaji wa huduma za kibingwa , kabla wananchi  walilazimika kusafiri umbali mrefu  na kutumia gharama kubwa kufuata huduma.