Wananchi wapewe Elimu Juu ya Ukusanyaji wa Taka ngumu

Posted on: July 31st, 2021

Mstahiki Meya wa Manispaa ya Mtwara –Mikindani Bi. Shadida Ndile, amewataka Madiwani wa Manispaa ya Mtwara –Mikindani   kutoa elimu kwa wananchi juu ya ukusanyaji na matumizi ya ada ya taka ngumu ili kuleta uelewa wa pamoja.  

“Mitambo inayotumika kubebea taka inahitaji ukarabati, lakini pia ada hizo zinatumika katika utekelezaji wa miradi mbalimbali   katika Manispaa yetu, tuwape elimu ya kutosha wananchi ili  wajue fedha hizo zinatumikaje” Amesema Mhe.Ndile

Mhe.Ndile ametoa agizo hilo  Agosti 1, 2021 katika Mkutano maalumu wa Baraza la Madiwani  wa Manispaa ya Mtwara Mikindani uliofanyika katika Chuo cha ualimu (TTC).

Ameendelea  kusema kuwa  sio kwamba wananchi hawana utayari wa  kuchangia ada ya taka ,  baadhi yao  hawana uelewa  wa kutosha juu ya matumizi ya  fedha hizo,  hii inapelekea mwananchi kusita kuchangia ada ya ukusanyaji taka .

Mhe. Ndile ameendelea kuishukuru Serikali ya Jamhuri ya Muungano wa Tanzania kwa kuendelea kuboresha   miundombinu mbalimbali katika Manispaa ya Mtwara Mikindani  na  amewataka Madiwani kuendelea  kuwapa taarifa wananchi juu ya miradi mbalimbali inayoendelea kutekelezwa.

"Naishukuru sana Serikali kwa kuendelea kuboresha miundombinu, Kuna miradi mbalimbali inatekelezwa  katika Kata zetu, tutumie  vikao vyetu kuwajulisha wananchi  maendeleo ya  miradi hiyo,  sisi wote  ni mashahidi  juu ya maboresho ya  miundombinu, Elimu pamoja na afya ,”Amesema Mhe.Ndile