Wasimamizi,Wataalamu wa TEHAMA, Makarani wa Sensa Watakiwa Kuwa Wazalendo

Posted on: August 15th, 2022

Katibu Tawala Wilaya ya Mtwara Thoams Salala akizunumza na makarani watakaofanya kazi kwenye zoezi la sensa ya watu na makazi

Katibu Tawala Wilaya ya Mtwara Thomas Salala amewataka makarani  wa sensa,wasimamizi wa maudhui ya sensa na wataalamu wa TEHAMA  ngazi ya Kata kuhakikisha wanakuwa wazalendo wanapoenda kufanya kazi ya uingizaji wa taarifa kwenye zoezi la sensa ya watu na makazi ili kupata takwimu sahihi zitakazotumika kwenye kupanga mipango ya mendeleo ya Taifa. linalotarajia kufanyika Agosti 23, 2022.

Salala  ametoa wito huo leo Agosti 15,2022 kwenye mafunzo elekezi ya makarani wa sensa yanayoendelea kufanyika Katika Ukumbi wa Chuo Kikuu cha Stella Maris kilichopo Mtwara.

Aidha Amewataka washiriki wa mafunzo hayo  kuliendea zoezi hilo kwa umakini mkubwa  huku wakitambu kuwa  Taifa limewapa  dhamana kubwa ya kufanya kazi hiyo ya sensa  kwa niaba ya watanzania.

“Kazi mnayoenda kuifanya ni kubwa, ya kiwango kikubwa, yenye maslahi mapana ya nchi yetu leo kesho na kesho kutwa,mkaifanye kwa uangalifu kwa faida ya kwetu sote’amesema Salala.

Aidha amewahakikishia washiriki hao ushirikiano mkubwa na ulinzi  wa kutosha kwenye zoezi hilo na amewataka   kutoa taarifa mapema kwa mwenyekiti wa sensa wa Wilaya pale watakapokutana na changamoto yoyote.

Akizungumza kwa niaba ya Makarani wenzake Bwana Mohamedi Nguyahambi ameishukuru Serikali kwa kuwachagua kuifanya kazi hiyo kubwa na muhimu kwa Taifa na ameuhakikishia uongozi wa Mkoa na Wilaya kuwa wanaenda kuifanya kazi hiyo kwa uadilifu na kwa kuzingatia yale yote waliyofundishwa.

Mafunzo elekezi ya Uingizaji taarifa kwenye zoezi la sensa ya watu na makazi Manispaa ya Mtwara-Mikindani yameanza Julai 31 na yatamalazikia Agosti 18, 2022