Wazazi Kituo Cha Afya Likombe Washikwa Mkono

Posted on: March 5th, 2025

Kuelekea kilele cha Maadhimisho  Siku ya Wanawake Duniani, Mjumbe Kamati ya Utekelezaji wa Umoja wa Wanawake wa Chama cha Mapinduzi (CCM) Wilaya ya Mtwara Mjini, Bi. Asha Mbani amewaongoza Viongozi na Wanawake wa Kata ya Likombe kukabidhi vifaa na mahitaji mbalimbali katika  wodi ya Wazazi (Matenity ward) katika kituo cha afya Likombe.

Akiongozana na Diwani Viti Maalum wa Kata Rahaleo, Mhe. Bhahia Abubakari na Diwani wa kata hiyo, Mhe. Said Seifu, wamesema Lengo ni kutambua mchango wa Wanawake katika Jamii kwa kuwapatia mahitaji yote stahiki wakati wa kujifungua sambamba na kuwapunguzia gharama baada ya kujifungua.

Wamesema jumla ya wanawake 24 wamepatiwa mahitaji zikiwemo Nepi za kisasa 'Diapers', Sabuni za unga, Sabuni za Kuongea, na Dawa za Meno 'toothpaste'.

Vilevile, wamekabidhi Taulo za kike na kalamu za wino kwa wanafunzi wa shule ya Sekondari Likombe sambamba na kushiriki  kufanya usafi wa mazingira katika  eneo la kituo cha afya Likombe.

Wamesema msaada huo umetokana na nguvu za michango kutoka kwa viongozi hao pamoja Wanawake wa kata hiyo.

Kaulimbiu ya Siku ya Wanawake Duniani mwaka huu ni “Wanawake na Wasichana 2025: Tuimarishe Haki, Usawa na Uwezeshaji” ambayo imetokana na Kaulimbiu ya Kimataifa ‘’For All Women and Girls, Equality, Rights, Empowerment’’.