Wenyeviti wa mitaa Wasisitizwa Kuhamasisha Wananchi Kujiunga na Bima ya afya Nafuu

Posted on: September 18th, 2024

Mganga Mkuu  wa Manispaa  ya Mtwara-Mikindani Dkt. Elizabeth Oming’o amewasisitiza  Wenyeviti wa Serikali  za mitaa kuwahamasisha wananchi  kujiunga  na huduma  ya afya ya Jamii iliyoboreshwa (ICHF)  ili waweze kupata huduma  za afya  kwa gharama  ndogo  na kwa uhakika.

Dkt.Oming'o amesema kuwa bima hiyo inapatikana kwa gharama ya shilingi elfu thelathini(30000)  kwa mwaka ambapo inajumuisha  familia  isiyozidi  watu sita.

Aidha  ametoa  rai kwa wenyeviti  hao kuwasilisha  majina  ya wazee wenye sifa kuanzia miaka sitini (60) ili wapatiwe  vitambulisho  vitakavyowasaidia kupatiwa huduma ya matibabu bure na kwa wakati.

Kwa upande wake Meya  wa Manispaa ya Mtwara-Mikindani Mhe.Shadida Ndile  amemwagiza Mganga Mkuu huyo  kuwasisitiza  watumishi wa afya walio chini  yake kufanya kazi kwa kuzingatia taratibu  za utumishi wa umma  ikiwemo  matumizi ya  fasaha ya lugha kwa wagonjwa.

Hayo yamesemwa Septemba 18,2024 kwenye kikao na Wenyeviti wa Serikali  za Mitaa kilichofanyika kwenye Ukumbi wa CCM Mkoa wa Mtwara.