Wenyeviti, Watendaji wa Mtaa Watakiwa Kushirikisha Wananchi Katika Utekelezaji wa Miradi

Posted on: July 22nd, 2021

Mstahiki Meya wa Manispaa ya Mtwara -Mikindani Bi. Shadida Ndile, amewataka  Watendaji na Wenyeviti wa Mitaa  kushirikisha  wananchi katika   utekelezaji wa  miradi mbalimbali   ndani ya  Manispaa ya Mtwara-Mikindani    ili   kuimarisha ulinzi na   usimamizi  wa miradi hiyo.

“Pamoja na kusimamia shughuli za kimaendeleo  katika maeneo yetu , tukaoneshe uhitaji wa wananchi katika   miradi inayoendelea kutekelezwa  ndani ya Kata na Mitaa  yetu,hii  inaleta   uelewa wa pamoja na inamfanya mwananchi kuilinda na kuithamini miradi hiyo”Amesema Mhe.Ndile

Mhe.Ndile ametoa rai hiyo  Julai  22, 2021  katika kikao  kazi kilichoshirikisha Mkuu wa Police Wilaya( OCD), Watendaji na Wenyeviti wa Mitaa pamoja na wakuu wa Idara  kilichofanyika katika Chuo cha Ualimu-Kawaida (TTC).

Amesema kuwa ili kuleta maendeleo, mwananchi anatakiwa kupata taarifa sahihi juu ya shughuli za kimaendeleo zinazoendelea kutekelezwa katika Manispaa ya Mtwara Mikindani   ili kuleta hamasa na kuunga mkono juhudi za Serikali.

Katika kufanikisha hilo  Mhe.Ndile ameendelea   kuwasisitiza watumishi  hao kushirikiana  na     kuwa wabunifu katika kushughulikia changamoto  mbalimbali ndani ya jamii  ili  kuimarisha mahusiano   baina yao  na   kuepuka migogoro isiyo na tija.

Nae  Kaimu Mkuu wa Polisi Wilaya ya Mtwara Bw. Gilbert Kalanje  amewataka watumishi hao kuhuhisha na kuimarisha vikundi vya ulinzi shirikishi  katika Kata na Mitaa ili kuimarisha ulinzi   na usalama wa raia na mali zao  ndani ya   Manispaa ya Mtwara Mikindani.