RC Gaguti aagiza Wafanyabiashara Kuhamia Soko La Chuno

Posted on: May 31st, 2021

Mkuu wa Mkoa wa Mtwara Brig. Jen Marco Gaguti awataka wananchi  wanaofanya biashara  sabasaba na maeneo mengine kuhamisha bidhaa zao na kuhamia soko la  chuno.

Amesema kuwa tayari ofidi yake  ishatoa maelekezo ya kutaka bidhaa zote kuhamia soko la Chuno na kwamba itasimamia kuhakikisha  wafanyabiashara hao wanahamia sokoni hapo.

Gaguti ametoa maagizo hayo leo Mei 31, 2021 alipofanya ziara yake ya kwanza ya ukaguzi wa soko la Chuno pamoja na kuongea na wafanyabiashara wa soko hilo.

Katika kuhakikisha soko hili linaendelea kufanya kazi amewasisitiza wananchi wote wa Manispaa  ya Mtwara –Mikindani kutumia soko la Chuno kupata huduma  mbalimbali badala ya kutumia  masoko mengine.

 “Itakuwa ni dharau sana kwa Serikali imetuletea soko zuri halafu hatutaki kulitumia ni dharau kwa watanzania pia kwa sababu fedha hizi ni kodi ya wananchi tulitumie soko hili vizuri”Amesema Gaguti

Wakati huo huo Gaguti ameishukuru Serikali kwa kutoa shilingi Bilioni 5.3 za ujenzi wa soko  hilo na kuwataka wafanyabiashara kutoa huduma iliyo bora na kuuza bidhaa bora ili kuwapata wateja badala ya kuamini Imani za kishirikina.

Aidha amewahaidi kuwapa ushirikiano wajasiri ya mali wadogo waliopo kwenye Mkoa wake ili waweze kufanya biashara kwenye mazingira mazuri na kuongezea kipato.

Hii ni  ziara yake ya kwanza kufanya ndani ya Mkoa wa Mtwara tangu alipoteuliwa na  Mhe. Rais wa Jamhuri ya Muungano wa Tanzania Samia Suluhu Hassan Mei 15 Mwaka huu.